Кыргыз Республикасынын айыл чарба секторун өнүктүрүүнүн перспективалары жөнүндө

Министрлер Кабинетинин Төрагасы — Кыргыз Республикасынын Президентинин Аппаратынын Жетекчиси Акылбек Жапаров Агрофорумда сүйлөгөн сөзүндө Кыргыз Республикасындагы айыл чарба тармагын өнүктүрүүнүн алдын алуу тууралуу айтып, ошондой эле Борбордук Азия аймагындагы  узак мөөнөттүү тенденцияларды белгилеп кетти.

А. Жапаровдун айтымында, 2050-жылга карата Борбор Азияда калктын саны 27 пайызга көбөйөт, демек тамак-ашка жана ичүүчү сууга болгон муктаждык 35 жана 50 пайызга өсөт. Ошондой эле, Министрлер Кабинетинин башчысы аймактын деңизге жетүүнүн жоктугу, ресурстарга көз карандылык, финансылык инструменттерге жетүүнүн чектелгендиги жана климаттын өзгөрүшүнүн терс таасири өңдүү негизги көйгөйлөрүнө токтолду.

«Суу — учурда Борбор Азия чөлкөмүндөгү өлкөлөрдүн жашоо-турмушунун негизги артериясы болуп саналат. Суу жана жашыл энергетика региондогу бардык мамлекеттердин туруктуу өнүгүүсүн камсыз кылуу үчүн Борбордук Азияда бириктирүүчү фактор болуп калышы мүмкүн жана болууга тийиш», — деди А. Жапаров.

Кыргызстандын экономикалык өнүгүү келечегине токтолгон саясатчы 2024-жылы ички дүң продукциянын көлөмү 1,4 триллион сом деңгээлинде күтүлүп жатканын, реалдуу өсүш темпи 6,0 пайыз деңгээлинде экенин белгиледи. Ал ошондой эле айыл чарба продукциясынын көлөмү өсүмдүк өстүрүүнүн (2,7 пайызга) жана мал чарбачылыгынын (2,2 пайызга) эсебинен 2,8 пайызга өсүшү күтүлүп жатканын кошумчалады.

А. Жапаров Өкмөттүн негизги максаттарынын бири катары азык-түлүккө болгон баанын туруктуулугун камсыз кылууну атады. Бул жарандарды дүйнөлүк рыноктордогу туруксуздуктан коргоо жана сапаттуу продукциянын жеткиликтүү баада болушун камсыздоо үчүн зарыл экенин баса белгиледи.