Ўзбекистонда давлат-хусусий шериклик (ДХШ) фаол ривожланмоқда

Жорий йилнинг биринчи чорагида вазирлик ва идоралар билан ҳамкорликда умумий қиймати 285,8 миллион долларлик 25 ДХШ лойиҳаси бўйича шартномалар имзоланди.

Хусусан, Саудиянинг АCWA Power  компанияси Қорақалпоғистонда 200 МВт қувватга эга, 100 МВт қувватни сақлай оладиган 262,65 миллион долларлик шамол станциясини қуриш ва бошқариш бўйича тендерда ғолиб чиқди.

Шунингдек, сув хўжалиги соҳасида умумий қиймати 550 минг АҚШ доллари бўлган 10 та, таълим соҳасида умумий қиймати 20,46 миллион АҚШ доллари бўлган 9 та ва маданият соҳасида умумий қиймати 2,14 миллион АҚШ доллари бўлган 5 та лойиҳа бўйича шартномалар имзоланди.

Бундан ташқари, 2024 йилда «Ўзбекистон-2030»стратегияси доирасида ДХШ ни ривожлантириш мақсадларига бағишланган давлат – хусусий шериклик бўйича халқаро давра суҳбати бўлиб ўтди. Давра суҳбатида 200 дан ортиқ хорижий инвесторлар, халқаро молия институтлари ва банклар вакиллари, шунингдек, республика вазирлик ва идоралари ходимлари иштирок этди. Давра суҳбати натижаси бўйича 5 та ҳужжат имзоланди.

Шу билан бирга, Ўзбекистон Иқтисодиёт ва Молия вазирлиги ҳамда Европа тикланиш ва тараққиёт банки ўртасида «Ўзбекистонда давлат-хусусий шериклик лойиҳаларини ривожлантириш жамғармаси» ни ташкил этиш учун 10 миллион евро миқдорида кредит шартномаси ва ҳамкорлик шартномаси имзоланди.