Наурыз айының соңында Қазақстан Республикасының Индустрия және құрылыс министрі Қанат Шарлапаев Шымкент қаласына сапары барысында Қазақстандағы ең ірі кәсіпорындардың бірі болып табылатын, ел экономикасының аса маңызды салалары үшін мамандандырылған құрал-жабдықтарды өндіріп жеткізетін «KARLSKRONA LC AB» ЖШС инжинирингтік компаниясына келіп кетті.

Сапар барысында министр кәсіпорын басшылығы мен қызметкерлерімен әңгімелесіп, «KARLSKRONA LC AB» ЖШС-нің Қазақстанның индустриялық базасын қамтамасыз етуге және ел экономикасын дамытуға қосқан үлесін атап өтті.

Кәсіпорын озық жабдықтармен және сандық бақылау және сынақ стендтері бар заманауи машиналармен жабдықталған. 137 қызметкер жыл сайын 10 000 бірлікке дейін сорғы қондырғылары мен 5 000 тонна құю өнімдерін өндіруді қамтамасыз етеді. Кәсіпорын өнімдері Қазақстан экономикасының ішкі қажеттіліктерін қанағаттандырып қана қоймай, көршілес елдерге: Ресейге, Қырғызстанға, Өзбекстанға, Тәжікстанға да көптеп экспортталады.