Қазақстанда активтерді қалпына келтіру жұмыстары жүргізілуде

2024 жылғы 29 наурызда Қазақстан Республикасының Премьер-Министрі Олжас Бектеновтың төрағалығымен активтерді өтеу жөніндегі Комиссияның жаңартылған құрамдағы отырысы өтті. Комиссия құрамына жаңа мүшелер енді: «Қазақстанның Азаматтық Альянсы» Заңды Тұлғалар Бірлестігінің президенті Бану Нұрғазиева және Қазақстан Республикасы Парламенті Мәжілісінің депутаты Марат Бәшімов.

«Мемлекет басшысының тапсырмасы бойынша заңсыз алынған активтерді қайтару жұмыстары күшейтіледі. Бұл ретте бизнеске қысым көрсетуге жол беруге болмайды. Мемлекетке қайтарылған барлық мүлік әлеуметтік пайдалы мақсаттарға пайдаланылады», — О.Бектенов баса айтты. 

Бүгінгі таңда заңсыз жолмен алынған 85 миллиард теңгеден астам мүлікті қайтару шаралары қолға алынған. Сөз Қазақстандағы да, шетелдегі де активтер туралы болып отыр. Атап айтқанда, тұрғын үйлер мен әкімшілік ғимараттар, қолма-қол ақша, компаниялардағы үлестер, қымбат әшекейлер мен жер телімдері.