Қазақстан Республикасының Индустрия және құрылыс министрлігінде су тасқынынан кейін тұрғын үйлерді қалпына келтіру жұмыстарын үйлестіру үшін 3 жедел топ құрылды.

Бірінші топты ҚР Индустрия және құрылыс министрі Қанат Шарлапаев басқарды. Ол бұған дейін Ақтөбе облысына сапар жасап, Ақмола және Қостанай облыстарына сапарларын жоспарлаған.

Қ.Шарлапаев Ақтөбе облысына сапары барысында су тасқынынан зардап шеккендерге жаңа тұрғын үй салу үшін әкімдік тарапынан бөлінген жер телімдерін аралап көрді. Әңгіме 436 дайын жер учаскесі туралы болып отыр (Ойыл ауданында 321, Қобда ауданында 77, Әйтекеби ауданында 22, Темір ауданында 10 және Ақтөбе қаласында 6).

Министр жүргізіліп жатқан жұмыстардың тиімділігі мен сапасын қамтамасыз ету үшін қалпына келтіру мәселесін жеке бақылауда ұстайтынын атап өтті.

Құрылыс және тұрғын үй-коммуналдық шаруашылық істері комитеті төрағасының міндетін атқарушы Бақытжан Жүнісбеков бастаған екінші жедел топ Павлодар және Абай облыстарында болып, Шығыс Қазақстан облысына жол тартты.

Соңында «Мемлекеттік сараптама» мемлекеттік кәсіпорнының директоры Қуандық Қажкенов бастаған үшінші жедел топ Батыс Қазақстан облысына келіп, одан әрі Солтүстік Қазақстан және Атырау облыстарына жол тартады.