23-yanvar kuni O‘zbekiston Prezidenti Shavkat Mirziyoyev Yevropa Kengashi rahbari Antoniu Koshta bilan telefon orqali suhbatlashdi. Rahbarlar ikki tomonlama hamkorlik va xalqaro kun tartibining asosiy masalalarini muhokama qilib, aprel oyida Samarqandda bo‘lib o‘tadigan “Markaziy Osiyo — Yevropa Ittifoqi” birinchi sammitiga tayyorgarlik masalalariga alohida e’tibor qaratdilar.

O‘zbekiston Prezidenti Antoniu Koshtani Yevropa Kengashi rahbari lavozimiga saylangani bilan qutladi va unga bu muhim vazifada muvaffaqiyatlar tiladi. Shavkat Mirziyoyev O‘zbekiston-Yevropa munosabatlari jadal rivojlanayotganini ta’kidlab, so‘nggi yillarda ko‘p qirrali hamkorlik yangi bosqichga ko‘tarilganini qayd etdi.

2024 yilda O‘zbekiston va Yevropa Ittifoqi mamlakatlari o‘rtasidagi tovar ayirboshlash hajmi 6 milliard yevrodan oshib, Yevropa kompaniyalari bilan qo‘shma loyihalar portfeli 30 milliard yevroga yetdi. Muhim yutuqlardan biri sifatida strategik mineral resurslar sohasida strategik sheriklik to‘g‘risidagi bitim imzolanishi qayd etildi.

Transport, raqamli aloqalar, “yashil” iqtisodiyot va madaniyat sohalarida ham samarali hamkorlik davom etmoqda. O‘zaro aloqalarni mustahkamlashda muhim qadam bo‘ladigan Kengaytirilgan sheriklik va hamkorlik to‘g‘risidagi bitimning yaqin kelajakda imzolanishiga ishonch bildirildi.