O‘zbekistonda kartoshkaga bo‘lgan ehtiyojni o‘z ishlab chiqarishi hisobidan to‘liq qondirish rejalashtirilmoqda. Bugungi kunda bu ekin 290 ming gektar maydonda yetishtirilayotgan bo‘lsa-da, mahsulotning bir qismi hamon chetdan olib kelinmoqda. Buning asosiy sababi mahalliy navlarning hosildorligi va sifati yetarli darajada emasligi bo‘lib, bu masala Prezident Shavkat Mirziyoyev raisligida 30-yanvar kuni o‘tkazilgan yig‘ilishda asosiy muhokama mavzusiga aylandi.

Davlat rahbari Kartoshkachilik ilmiy-tadqiqot institutiga mahalliy iqlimga moslashgan, yuqori hosildor navlarni yaratish, shuningdek, laboratoriya sharoitida “in-vitro” usulida 3 million dona tuganakni yetishtirish vazifasini topshirdi.

Sohani qo‘llab-quvvatlash maqsadida 2025-yilda Qishloq xo‘jaligi jamg‘armasidan 400 milliard so‘m ajratiladi. Bundan tashqari, keyingi uch yil davomida import qilinadigan urug‘lik kartoshka bojxona to‘lovlaridan ozod etiladi. Qishloq xo‘jaligi vazirligi ma’lumotlariga ko‘ra, mamlakatning kartoshkaga bo‘lgan yillik ehtiyoji 4 million tonnani tashkil etadi va 2027-yilga kelib O‘zbekiston importdan butunlay voz kechishni rejalashtirmoqda.