O‘zbekistonda yovvoyi hayvonlarni noqonuniy saqlash uchun ma’muriy javobgarlik o‘rnatildi. 2025-yil 16-yanvarda qabul qilingan O‘RQ-1019-sonli Qonunga ko‘ra Ma’muriy javobgarlik to‘g‘risidagi kodeksga tegishli o‘zgartirishlar kiritildi.

Bundan buyon jismoniy shaxslarga saqlash taqiqlangan yovvoyi hayvonlarni saqlaganlik uchun hayvonlarni musodara qilish bilan birga, BHMning 5 baravaridan 10 baravarigacha (1,875 mln — 3,75 mln so‘m) miqdorida jarima belgilandi. Agar qoidabuzarlik odamlarning sog‘lig‘iga yoki mol-mulkiga zarar yetkazilishiga sabab bo‘lsa, jarima BHMning 30-50 baravarigacha (11,25 mln — 18,75 mln so‘m) oshiriladi.

Aholi punktlarida hayvonlarni saqlash qoidalarini buzganlik uchun javobgarlik ham kuchaytirildi. Buning uchun fuqarolarga BHMning 3 baravaridan 5 baravarigacha (1,125 mln — 1,875 mln so‘m), mansabdor shaxslarga esa BHMning 5 baravaridan 10 baravarigacha (1,875 mln — 3,75 mln so‘m) miqdorida jarima solish ko‘zda tutilgan. Zarar yetkazilgan holatlarda jarima miqdori: fuqarolar uchun — BHMning 10 baravaridan 15 baravarigacha (3,75 mln — 5,625 mln so‘m), mansabdor shaxslar uchun — BHMning 15 baravaridan 30 baravarigacha (5,625 mln — 11,25 mln so‘m) etib belgilandi.