O‘zbekiston IT-parki va Rossiyaning “Russoft” uyushmasi qo‘shma korxonalar tashkil etishda hamkorlik qilish bo‘yicha kelishuvga erishdi. Tegishli bitim Rossiya IT-kompaniyalarining Toshkentdagi biznes-missiyasi doirasida imzolandi, deya xabar bermoqda Rossiya Federatsiyasining Savdo vakolatxonasi.

Rossiyaning to‘qqizta kompaniyasidan iborat delegatsiya o‘z dasturiy mahsulotlarini taqdim etib, xalqaro bozorlardagi muvaffaqiyatli loyihalarni amalga oshirish tajribasi bilan o‘rtoqlashgan holda, O‘zbekistonlik istiqbolli hamkorlar bilan muzokaralar olib bordi. O‘zbekiston tomoni xodimlar samaradorligini nazorat qilish, muhandislik dasturiy ta’minoti va elektron tijorat uchun IT-yechimlariga alohida qiziqish bildirdi.

Imzolangan kelishuv ikki mamlakat IT-kompaniyalari o‘rtasidagi o‘zaro hamkorlikni mustahkamlashga qaratilgan. Raqamli texnologiyalar va biznes xizmatlari sohasida qo‘shma korxonalar tashkil etish hamda yangi loyihalarni amalga oshirish rejalashtirilmoqda.