2025-yilda O‘zbekistonda ikkita pullik avtomobil yo‘li — Toshkent-Andijon va Toshkent-Samarqand qurilishiga start beriladi. 314 kilometr uzunlikdagi birinchi yo‘l loyihasi Jahon banki ko‘magida ishlab chiqilgan. Yangi magistral yo‘l safar vaqtini besh soatdan uch soatgacha qisqartirish, yo‘l-transport hodisalari sonini 40 foizga kamaytirish va mamlakatning yalpi ichki mahsulotini 2,6 foizga oshirish imkonini beradi.

Transport vaziri Ilhom Mahkamov “O‘zbekiston 24” telekanaliga bergan intervyusida ushbu yo‘l poytaxtni 10,5 milliondan ortiq aholi istiqomat qiladigan Farg‘ona vodiysi bilan bog‘lovchi muhim transport arteriyasi bo‘lishini ta’kidladi. Uning so‘zlariga ko‘ra, loyiha prezidentning alohida nazorati ostida turibdi.

Bundan tashqari, joriy yilda Toshkent va Samarqand o‘rtasida olti qatorli pullik avtomobil yo‘li qurilishini boshlash rejalashtirilmoqda. Barcha loyiha hujjatlari yakunlangach, tender o‘tkaziladi.