2025-yil 1-iyuldan O‘zbekistonda ulushli qurilishning shaffofligini va xavfsizligini oshirishga qaratilgan “Uy-joylarning yagona hayotiy sikli” nomli yangi tamoyil amal qila boshlaydi. Uning doirasida quruvchilar fuqarolarning mablag‘larini faqat kadastr organlarida majburiy ro‘yxatdan o‘tkaziladigan notarial tasdiqlangan shartnomalar orqali jalb qilishlari mumkin bo‘ladi.

Loyihalar quruvchining o‘z mablag‘lari, bank kreditlari va boshqa ruxsat etilgan manbalar hisobidan moliyalashtiriladi. Maqsadli kredit olishdan oldin qurilish ishlarining kamida 30 foizi kompaniyaning o‘z mablag‘lari hisobidan bajarilishi shart. Kreditlar bo‘yicha foiz stavkasi miqdori eskrou-hisobvaraqlarda saqlanayotgan summaga bog‘liq bo‘ladi: mablag‘lar qancha ko‘p bo‘lsa, stavka shuncha past bo‘ladi.

Ulushdorlarning barcha to‘lovlari tijorat banklaridagi maxsus eskrou-hisob raqamlarida saqlanadi, bu esa qurilish kompaniyalari tomonidan majburiyatlarning bajarilishini kafolatlaydi. Ushbu hisobvaraqlardagi mablag‘larni xatlash yoki quruvchining qarzlari bo‘yicha hisobdan chiqarish mumkin emas. Qurilish tugagandan so‘ng, eskrou-hisob raqamidagi pul kreditni to‘lashga, qolgan summa esa quruvchiga beriladi.

Qurilish kechiktirilgan taqdirda, ulushdorlarga har bir kechiktirilgan kun uchun kompensatsiya to‘lanishi nazarda tutilgan. Agar obyekt ko‘rsatilgan muddatdan keyin olti oy ichida topshirilmasa, xaridor shartnomani bekor qilishi va sarmoya qilingan pulni qaytarib olishi mumkin. Muddatlar faqat ulushdorning roziligi bilan uzaytirilishi mumkin.

Bundan tashqari, agar obyekt foydalanish uchun ruxsatnoma olmagan bo‘lsa, qurilayotgan uylarda turar joy huquqini beruvchi qimmatli qog‘ozlarni chiqarish taqiqlanadi.