O‘zbekiston Prezidenti Shavkat Mirziyoyev 4-fevral kuni kechqurun Bosh vazir Anvar Ibrohimning taklifiga binoan Malayziyaga rasmiy tashrif bilan yetib keldi. Kuala-Lumpur xalqaro aeroportida uni Parlament Vakillar palatasining spikeri Johari bin Abdul, ta’lim vaziri Zambri Abdul Qodir va boshqa rasmiy shaxslar kutib olishdi.

O‘zbekiston rahbarining tashrifi sharafiga faxriy qorovul saflandi, ikki mamlakat davlat bayroqlari ko‘tarildi. Aeroportda Malayziya parlamenti rahbariyati bilan uchrashuv o‘tkazildi. Unda faol parlamentlararo hamkorlik, o‘zaro tashriflar va qonunchilik faoliyatidagi hamkorlik istiqbollari muhokama qilindi. Shuningdek, tomonlar investitsiya, infratuzilma va gumanitar dasturlarni rivojlantirish masalalariga e’tibor qaratishdi.

Tashrifning asosiy tadbirlari 5 fevralga rejalashtirilgan. O‘zbekiston Prezidenti Malayziya Bosh vaziri bilan muzokara o‘tkazadi va O‘zbekiston-Malayziya biznes-forumida ishtirok etadi. Uchrashuv yakunida bir qator hukumatlararo va idoralararo bitimlar imzolanishi kutilmoqda.