7-июнда Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Акылбек Жапаров “Кыргыз Республикасы: глобалдык технологияларды бириктирүү!” аттуу KIT-2024 форумуна катышты
Министрлер Кабинетинин башчысы белгилегендей, Кыргызстан бүгүнкү күндө техникалык билим берүү потенциалы жакшы өлкө болуп саналат, анын алдыңкы прикладдык математика жана системалык анализ мектептеринде өз өкүлдөрү бар. Ата мекендик IT адистери чет өлкөдө жакшы таанымал, алардын көбү алыстан жана түздөн-түз санариптик технологияларда лидер болгон компанияларда иштешет.
«Өлкөнүн Президенти санариптик өнүгүүнүн жаңы стратегиясын бекитти, ал мамлекеттик органдарга жарандар үчүн сезилерлик натыйжаларды берген санариптик долбоорлорду ишке киргизүүгө мүмкүндүк берет. Биз санариптик технологияларды колдонуунун негизинде экономикада жана социалдык процесстерде болуп жаткан тектоникалык өзгөрүүлөрдүн күбөсү жана ошол эле учурда жаратуучуларыбыз.
Жаңы санариптик чындык өлкөлөрдү жана бүтүндөй аймактарды тездик менен өзгөртүп, бардык секторлордо башкарууну жана кызмат көрсөтүү моделдерин өзгөртөт. Бизге санариптик, эң негизгиси акылдуу жана эффективдүү чечимдерге негизделген мамлекеттик башкаруунун жаңы модели керек. Санариптик технологиялар бүт өлкөгө киргизилиши керек. Бул багытта алгачкы кадамдар жасалды. Учурда министрлер кабинети кагаз документациядан баш тартып, санариптик технологияларды көбүрөөк колдонот.
Биз санариптештирүү жолунда жакшы темп менен бара жатабыз, бирок мындан да чоң ийгиликтерге жетишүүбүз керек», — деп белгиледи А.Жапаров.
Сүрөт: Кыргыз Республикасынын Министрлер Кабинетинин расмий сайты