“Korzinka” supermarketlar tarmog‘i O‘zbekistondagi birinchi chakana savdo kompaniyasi va jahon sektorida dastlabkilardan biri sifatida 2022-yilgi ISO/IEC 27001 standartiga muvofiqlik xalqaro sertifikatini oldi. Bu yutuq CERT International akkreditatsiyalangan sertifikatlashtirish organi vakillari tomonidan o‘tkazilgan muvaffaqiyatli audit natijasi bo‘lib, kompaniyada xavflarni tahlil qilish asosida axborot xavfsizligini boshqarish tizimi joriy etilganligini tasdiqladi.

Sertifikatning olinishi «Korzinka»ning maxfiy ma’lumotlarni himoya qilish va axborot sizib chiqishi tahdidlarini kamaytirishga alohida e’tibor qaratgan holda ilg‘or jahon amaliyotlariga amal qilayotganidan dalolat beradi. Supermarketlar tarmog‘i bosh direktori Rud Pedersen ta’kidlaganidek, bu xavfsizlik tasdig‘i axborot bilan ishlashning ishonchli muhitini yaratish uchun muhim qadam bo‘lib, ayniqsa kiberjinoyatchilik va firibgarlik holatlari ko‘payishi sharoitida dolzarbdir.

O‘zbekiston Respublikasi Vazirlar Mahkamasi huzuridagi O‘zbekiston texnik jihatdan tartibga solish agentligining Menejment tizimlarini joriy etishni muvofiqlashtirish boshqarmasi boshlig‘i Asqarov Asqarali tashabbusni qo‘llab-quvvatlab, sertifikatlashtirish butun chakana savdo sektori uchun muhimligini ta’kidladi. Uning so‘zlariga ko‘ra, sertifikatning olinishi axborot xavfsizligi masalalariga mas’uliyatli yondashuvni ko‘rsatadi va boshqa kompaniyalar uchun namuna bo‘lib xizmat qiladi.

CERT International direktori Marat Xabibulinning aytishicha, sertifikatlashtirish birinchi yili nisbatan yengil kechgan, chunki audit faqat boshqaruvning tizimli jihatlarini qamrab olgan. Biroq, kelajakda tekshiruvlar yanada batafsil bo‘ladi, bu esa tashkilotlardan ko‘proq tayyorgarlikni talab etadi. Axborot xavfsizligi bo‘yicha mutaxassis Aleksandr Zorin qo‘shimcha qilishicha, jadal raqamlashtirish sharoitida xavfsizlikni boshqarish standartlari nafaqat muhim, balki maxfiy ma’lumotlarni himoya qilish va biznes barqarorligini ta’minlash uchun zaruriy ehtiyojga aylanmoqda.