Oliy Majlis Qonunchilik palatasida milliy qonunchilikni Jahon savdo tashkiloti bitimlari bilan uyg‘unlashtirish masalasiga bag‘ishlangan davra suhbati o‘tkazildi. Muhokamada deputatlar, vazirlik va idoralar vakillari, shuningdek O‘zbekiston Prezidentining JST masalalari bo‘yicha maxsus vakili ishtirok etdi.

So‘nggi ikki yil ichida mamlakatning tashkilotga a’zo bo‘lishi bo‘yicha muzokaralar jarayoni sezilarli darajada jadallashdi. Shu paytgacha Ishchi guruhning beshta yig‘ilishi o‘tkazilib, AQSH, Xitoy, Yaponiya va Turkiya kabi 20 dan ortiq davlat bilan ikki tomonlama muzokaralar yakuniga yetkazildi. O‘zbekistonning JSTga a’zo bo‘lishining asosiy shartlari aks ettirilgan hisobot loyihasi tayyorlandi va 20 dan ortiq qonun hujjatining xalqaro talablarga muvofiqligi tahlil etildi.

Asosiy mavzulardan biri O‘zbekistonni JSTga a’zo bo‘lishga yaqinlashtiradigan bir qator qonunlarni qabul qilish masalasi bo‘ldi. “O‘zbekiston-2030” strategiyasini amalga oshirish doirasida texnik jihatdan tartibga solish, mahsulot xavfsizligi, veterinariya to‘g‘risidagi qonunlarni, shuningdek ichki bozorni himoya qilish bo‘yicha chora-tadbirlarni tezkor tarzda qabul qilish rejalashtirilmoqda. Shuningdek, parlamentlararo hamkorlikni yo‘lga qo‘yish va qonunchilikni uyg‘unlashtirish jarayoni ustidan parlament nazoratini kuchaytirish masalalari ham muhokama qilindi.

Манбаъ: https://caravan-info.uz