Xalqaro Numbeo xizmati ma’lumotlariga ko‘ra, mart oyining birinchi o‘n kunligida O‘zbekiston mol go‘shti narxi bo‘yicha 127 mamlakat orasida 91-o‘rinni egalladi: bir kilogrammning narxi 8,1 AQSH dollarini tashkil etib, bu Qozog‘iston, Qirg‘iziston, Tojikiston va Rossiyada 7 dollardan oshmaydigan narxlardan yuqori. Eng qimmat mol go‘shti Shveysariyada (44,3 dollar), eng arzoni esa Pokistonda (4,04 dollar).

O‘zbekiston Milliy statistika qo‘mitasi ma’lumotlariga ko‘ra, bir yil ichida mol go‘shti 18,5 foizga, qo‘y go‘shti 19,4 foizga qimmatlashgan, tovuq go‘shti narxi esa pasaygan.

Mutaxassislar narxlarning oshishini go‘sht mahsulotlarining jahon miqyosida qimmatlashuvi (BMT ma’lumotlariga ko‘ra, 2025-yil fevral oyida go‘shtning dunyo narxlari 18 foizga, ayniqsa mol go‘shti narxi oshgan), shuningdek, yem-xashak, ishchi kuchi narxining ko‘tarilishi, ishlab chiqarish va transport xarajatlarining ortishi hamda O‘zbekistonda go‘shtga bo‘lgan an’anaviy yuqori talab bilan bog‘lamoqda.

Eslatib o‘tamiz, Markaziy bank so‘rovnomasi natijalariga ko‘ra, O‘zbekistonda 2024-yil dekabr oyida sezilgan inflyatsiya 14,7 foizni tashkil etib, so‘nggi 22 oydagi eng yuqori ko‘rsatkichga yetdi. Respondentlar go‘sht, sut, benzin, yoqilg‘i, elektr energiyasi, gaz, sabzavot va meva narxlari keskin oshganini ta’kidlashdi.

Biroq, iste’mol savati tovarlarining umumiy narxlar darajasidagi o‘zgarishni aks ettiruvchi rasmiy e’lon qilingan inflyatsiya darajasi ancha past bo‘ldi. Sezilgan va rasmiy inflyatsiya o‘rtasidagi farq shundan kelib chiqadiki, birinchisi fuqarolarning shaxsiy tajribasi va kundalik ehtiyoj mahsulotlari hamda xizmatlar narxlarining o‘sishini idrok etishiga asoslanib, iste’molchilar kayfiyatining o‘ziga xos “hissiy barometri” vazifasini bajaradi.

Diqqatga sazovor jihati shundaki, 2025-yil fevral oyida mamlakatda inflyatsiya 0,54 foizni tashkil etib, go‘sht narxi eng ko‘p oshgan mahsulotlar qatoriga kirdi.

Manba: https://caravan-info.uz/