Кыргызстандын Катар мамлекетиндеги элчиси Марат Нуралиев Катардын транспорт министри шейх Мохаммед бин Абдулла Аль Тани менен жолугушту.

Кыргызстандын Тышкы иштер министрлигинин басма сөз кызматы билдиргендей, тараптардын жолугушуусу 22-апрелде Доха шаарында өттү.

Жолугушууда тараптар кыргыз-катар кызматташтыгынын күн тартибиндеги негизги маселелерге токтолуп, ошондой эле жакынкы келечекте өлкөлөр ортосунда түз авиакаттамдарды ачуу мүмкүнчүлүгүн талкуулашты.

Мындан тышкары, тараптар эки өлкөнүн транспорт министрликтеринин ортосундагы кызматташтыкты түзүүгө багытталган алкактык макулдашуулардын долбоорлору боюнча пикир алышты.

Жолугушуунун соңунда тараптар сүйлөшүүлөрдүн жүрүшүндө жетишилген макулдашууларды мындан ары ишке ашыруу үчүн тыгыз байланышта болууну макулдашышты.