O‘zbekiston va Osiyo taraqqiyot banki (OTB) o‘rtasida 2025-2026 yillarga mo‘ljallangan umumiy qiymati 3,6 milliard dollarlik 23 ta yangi investitsiya loyihasini amalga oshirish bo‘yicha kelishuv imzolandi. Bu haqda O‘zbekiston delegatsiyasining 6-7 may kunlari Milanda bo‘lib o‘tgan OTB Boshqaruvchilar kengashining 58-yillik yig‘ilishidagi ishtiroki yakunlari bo‘yicha ma’lum bo‘ldi.

Oʻzbekiston delegatsiyasiga Bosh vazir oʻrinbosari Jamshid Xoʻjayev boshchilik qildi. Tadbir davomida 2025-2026 yillarga OTB Boshqaruvchilar kengashi raisligi O‘zbekistonga o‘tishi rasman e’lon qilindi. Xo‘jayev Kengash raisi etib tasdiqlandi.

OTB tomonidan moliyalashtiriladigan yangi loyihalar ta’lim va suv ta’minoti tizimlarini modernizatsiya qilish, transport infratuzilmasini rivojlantirish, moliyaviy va texnik yordam ko‘rsatish kabi mamlakatni ijtimoiy-iqtisodiy rivojlantirishning muhim yo‘nalishlarini qamrab oladi.

OTB Boshqaruvchilar kengashining navbatdagi yillik yig‘ilishi 2026-yil may oyida Samarqand shahrida bo‘lib o‘tishi muhim voqea bo‘ladi. Bu O‘zbekiston tarixda ikkinchi marta Bankning bunday nufuzli tadbiriga mezbonlik qiladi.

Eslatib oʻtamiz, soʻnggi besh yil ichida OTB Oʻzbekistonga 5,41 milliard dollardan ortiq mablagʻ ajratgan. Bu mablagʻlar mamlakatning “yashil” iqtisodiyotga oʻtishini osonlashtirish, xususiy sektorni rivojlantirishni qoʻllab-quvvatlash va inson kapitaliga sarmoya kiritishni ragʻbatlantirishga yoʻnaltirildi. Yangi kelishuvlar O‘zbekiston va Osiyo taraqqiyot banki o‘rtasidagi sheriklikning strategik mohiyatini ta’kidlaydi.