АСТАНА, 12 мамыр – «Караван Инфо» АА.Қазақстан Республикасы Денсаулық сақтау министрлігі жариялаған 2025 жылға арналған Біліктілікті арттыру жылы аясында 550-ден астам алғашқы медициналық-санитарлық көмек (МСАК) мамандары оқуға кірісті. Бастаманың мақсаты – кадрлық әлеуетті нығайту және медициналық көмекке қолжетімділікті арттыру.

1 сәуірден бастап үш жылға дейінгі тәжірибесі бар жас мамандарды, сондай-ақ медициналық жоғары оқу орындары мен колледждердің оқытушыларын қамтитын қосымша білім беру бағдарламасы іске қосылды. Оқыту аймақтық негізде медициналық мекемелердің базасында ұйымдастырылады.

Жалпы тәжірибелік дәрігерлер үшін 12 курс және орта буын медицина қызметкерлері үшін 6 курс әзірленген. Бүгінде еліміздің 12 облысынан 136 дәрігер мен 419 медицина қызметкері, сондай-ақ колледждердің 38 оқытушысы қайта даярлау курстарынан өтуде.

Жыл соңына дейін 908 дәрігер мен 1327 орта буын өкілдері оқуды аяқтап, алғашқы медициналық-санитарлық көмек жүйесін нығайтып, жалпы медициналық қызмет көрсету сапасын арттырады.

Суретті салған «Караван Инфо» АА