O‘zbekistonda yangi energiya manbalaridan foydalangan holda avtotransport vositalarini sinovdan o‘tkazish va sertifikatlash bo‘yicha innovatsion o‘quv markazini tashkil etish rejalashtirilmoqda. Loyiha Toshkent davlat texnika universiteti (TDTU) va Guangdong sanoat va savdo instituti o‘rtasida Xitoyning GAC avtomobil ishlab chiqarish korporatsiyasi ishtirokida amalga oshiriladi.

Ikki oliy o‘quv yurti o‘rtasidagi onlayn uchrashuvda tomonlar akademik aloqalarni kengaytirish, qo‘shma loyihalarni amalga oshirish va qo‘shma ta’lim dasturlarini joriy etish istiqbollarini muhokama qildilar.

Xususan, quyidagilar bo'yicha kelishuvlarga erishildi:

• GAC bilan hamkorlikda TDTU qoshida yangi energiya manbalaridan foydalanadigan avtotransport vositalarini sinovdan o‘tkazish va sertifikatlash bo‘yicha innovatsion o‘quv markazini tashkil etish.

• 3+1 formatidagi ta’lim dasturini ishga tushirish.

• Universitetlar o‘rtasida diplomlarni o‘zaro tan olish mexanizmini ishlab chiqish.

Tomonlar loyihalarni amalga oshirish mexanizmlarini mamlakatning tegishli vazirlik va idoralari bilan muvofiqlashtirish maqsadida joriy yilning iyun oyida Xitoy delegatsiyasining O‘zbekistonga tashrifini tashkil etish tashabbusini qo‘llab-quvvatladi.