O‘zbekiston delegatsiyasining Afg‘onistonga tashrifi doirasida Kobul shahrida “Made in Uzbekistan” savdo uyining tantanali ochilishi bo‘lib o‘tdi. Tadbirda O‘zbekiston va Afg‘oniston hukumatlari va ishbilarmon doiralari vakillari ishtirok etdi.

Yangi savdo uyi Afg‘oniston bozorida keng assortimentdagi o‘zbek mahsulotlarini ilgari surish va mahalliy aholi ehtiyojlarini qondirish uchun maydonga aylanishi ko‘zda tutilgan.

Tomonlar O‘zbekiston va Afg‘oniston o‘rtasidagi munosabatlarni mustahkamlash va savdo-sotiqni yanada rivojlantirish uchun savdo uyi ochish muhimligini qayd etdilar. Savdo uyida afgʻon xaridorlari bilan toʻgʻridan-toʻgʻri savdo aloqalarini yoʻlga qoʻyish imkoniyatini yaratuvchi elektrotexnika mahsulotlari va yangi texnologiyalar joylashtiriladi.

“O‘zeltexsanoat” uyushmasi vakillari Kobulda to‘g‘ridan-to‘g‘ri savdo shartnomalarini tuzish, hamkorlikni mustahkamlash va uzoq muddatli loyihalarni amalga oshirish, Afg‘oniston bozori ehtiyojlarini tahlil qilishga alohida e’tibor qaratish yuzasidan muzokaralar o‘tkazdi.

Savdo uyining ochilishi va yangi savdo imkoniyatlari, deyiladi assotsiatsiya matbuot xizmati xabarida, Oʻzbekistondan eksport qilinadigan mahsulotlar hajmini oshirish va ikki tomonlama iqtisodiy hamkorlikni yanada mustahkamlashga xizmat qiladi.