Кыргыз Республикасынын Жогорку Кеңешинин Төрагасы Нурланбек Тургунбек уулу Кыргызстанга расмий иш сапары менен келген Россия Федерациясынын Федералдык Жыйынынын Мамлекеттик Думасынын Төрагасы Вячеслав Володин менен жолугушту.

Жолугушууда эки өлкөнүн саясий-экономикалык жана маданий-гуманитардык алакаларынын учурдагы абалы, ошондой эле парламенттер аралык кызматташтыкты кеңейтүү маселелери талкууланды.

Жогорку Кеңештин төрагасы Нурланбек Тургунбек уулу Кыргызстан өзүнүн негизги стратегиялык өнөктөштөрүнүн бири катары Россия Федерациясы менен түзүлгөн кызматташтыкты мындан ары да өнүктүрүүгө кызыкдар экенин айтып, мындай жолугушуулар эки тараптуу мамилелерди тереңдетүүгө салым кошуп жатканын белгиледи.

"Биздин кызматташтыгыбыз жыл сайын жаңы деңгээлге чыгып, мамлекет башчыларынын 2023-жылдагы расмий сапарлары өнөктөштүктү бекемдөөнүн маанилүү этабы болуп калды. Буга байланыштуу парламенттер аралык байланыштарды жандандыруу зарыл. Анткени мамлекеттер аралык мамилелерди бекемдөөдө парламенттик дипломатия өзгөчө роль ойнойт", – деди ал.

Төрага ошондой эле Жогорку Кеңеш менен Мамлекеттик Думанын диалогу эл аралык аянтчаларда активдүү өнүгүп жатканын эске салды. Мисал катары ал КМШ Парламенттер аралык ассамблеясынын жана ЖККУнун Парламенттик ассамблеясынын алкагындагы өз ара аракеттенүүнү келтирди. Ошондой эле спикер өткөн жылы Федерация Кеңешинин жана Мамлекеттик Думанын жетекчилигинин чакыруусу менен Жогорку Кеңештин делегациясы БРИКС+ форматындагы пленардык жыйынга катышканын белгилеп, мындай иш-чаралар Кыргызстан менен Россиянын ортосундагы парламенттер аралык байланыштарды мындан ары да чыңдоого өбөлгө болорун баса белгиледи.

Теманы уланткан Жогорку Кеңештин төрагасы Нурланбек Тургунбек уулу июль айында Кыргыз Республикасы менен Россия Федерациясынын ортосундагы Түбөлүк достук, союздаштык жана өнөктөштүк жөнүндө Декларацияга кол коюлганына 25 жыл болгонун белгиледи. Буга байланыштуу ал эки тараптуу кызматташтыкты мындан ары өнүктүрүү боюнча бир катар сунуштары менен бөлүштү.

Ал билдиргендей, өткөн жылы өлкөлөр ортосундагы соода жүгүртүүнүн көлөмү 3,5 миллиард АКШ долларына жеткен.

"Бизде чоң мүмкүнчүлүктөр бар. Жакынкы аралыкта соода алакасын тереңдетип, товар жүгүртүүнү 5 миллиард долларга жеткирүү керек. Буга жетишүү үчүн биздин өлкөлөрдүн бизнес чөйрөлөрүнүн жана ишкерлеринин ортосундагы өз ара аракеттенүүнү активдештирүү зарыл. Биз орусиялык инвесторлор менен тыгыз кызматташууга жана биргелешкен долбоорлорду ишке ашырууга өзгөчө кызыкдарбыз", – деди төрага.

Жолугушуунун жүрүшүндө маданий-гуманитардык, өзгөчө билим берүү тармагындагы кызматташуу маселелери да талкууланды. Баяндамачы белгилегендей, бүгүнкү күндө 16 миң кыргызстандык студент Орусиянын алдыңкы жогорку окуу жайларында билим алууда. Кошумчалай кетсек, россиялык тараптын колдоосу менен Кыргызстанда 9 заманбап мектеп курулуп жатат, бул билим берүү тармагындагы келишимдердин ийгиликтүү ишке ашып жатканын айгинелейт.

Миграция чөйрөсүндөгү азыркы кырдаалга токтолгон Жогорку Кеңештин төрагасы Нурланбек Тургунбек уулу биздин өлкөнүн ЕАЭБге мүчөлүгүн жана Россиянын негизги өнөктөш катары статусун эске алуу менен кыргызстандыктар үчүн жеңилдиктерди жана айрым преференцияларды берүүнүн маанилүүлүгүн белгиледи. Ал эмгек мигранттарынын укуктарын коргоо жана мыйзамсыз аракеттерге каршы биргелешип күрөшүү маселелерине өзгөчө көңүл бурду.

Өз кезегинде Россия Федерациясынын Мамлекеттик Думасынын Төрагасы Вячеслав Володин иш сапарынын максатына токтолуп, мындай жолугушуулар парламенттер аралык кызматташтыкты гана кеңейтпестен, жалпысынан мамлекеттер аралык мамилелерди чыңдоого өбөлгө түзөрүн белгиледи.

Ал Россия Кыргызстан менен бардык багыттар боюнча кызматташууну өнүктүрүүгө кызыкдар экенин ырастады. «Атап айтканда, соода-экономикалык байланыштарды чыңдоо жана өз ара кызыкчылыкка негизделген өнөктөштүк мамилелерди өнүктүрүү зарыл», – деп белгиледи Вячеслав Володин, ошондой эле бул жаатта эки тараптуу чечимдерди иштеп чыгуу үчүн тиешелүү ведомстволордун катышуусунда миграция маселелерин Парламенттер аралык комиссиянын алкагында кароо зарылдыгын белгиледи.

Мындан тышкары Вячеслав Володин кесиптешин Улуу Жеңиштин 80 жылдыгы менен куттуктап, Улуу Ата Мекендик согуштагы Жеңишке кыргыз элинин кошкон салымын баса белгиледи.

«Кыргыз жоокерлеринин фронттогу эрдиги, оор согушта эвакуацияланган балдарды өз балдарындай калкалап, чоңойткон кыргыз энелеринин эрдиги биздин эсибизде түбөлүккө сакталат», – деп белгиледи Мамлекеттик Думанын төрагасы.