КАБУЛ, 21-май 2025-жыл – Кербен маалыматы.Талибан өкмөтүндөгү экономикалык маселелер боюнча вице-премьер-министр молдо Абдул Гани Барадардын айтымында, Ооганстанга алынып келинген дары-дармектер кымбат эле эмес, өлкөдөн чет элдик валютанын олуттуу агып кетишине да салым кошкон.

Бул тууралуу ал кечээ Талибан Саламаттыкты сактоо министрлиги уюштурган фармацевтикалык ишканаларга сертификаттарды тапшырууга арналган жыйында билдирди.

Жыйында фармацевтика тармагынын жетекчилерин улуттук жана эл аралык стандарттарга ылайык дары-дармек чыгарууга чакырды.

Ал баса белгиледи:
«Эгерде өлкөнүн фармацевтикалык заводдору улуттук жана эл аралык стандарттарга жооп берген дары-дармектерди чыгарса, бул маанилүү жетишкендик гана болбостон, өлкөнүн импорттук дарыларга болгон көз карандылыгын азайтат».

Ал ошондой эле бардык мамлекеттик органдарды талибдердин жогорку лидери Хайбатулланын буйругуна ылайык, ата мекендик продукцияга артыкчылык берүүгө жана сертификацияланган медициналык продукцияларды гана колдонууга чакырды.

Учурда Ооганстанга керектүү дары-дармектердин көбү коңшу өлкөлөрдөн алынып келинет. Бирок бул дары-дармектердин сапаты боюнча сындар айтылып, өлкөгө сапатсыз дарылар көп келет деген дооматтар бар.

Талибдердин сапатсыз дары-дармектердин импортуна каршы күрөшүү ниети тууралуу бир нече жолу билдирүүлөрүнө карабастан, иш жүзүндө бул багытта олуттуу кадамдар жасалган жок.

Сүрөт: Караван ААнын өнөктөштөрү