Ош шаарынын биринчи вице-мэри Адилет Шаршеналы уулу Улуу Британиянын Кыргыз Республикасындагы элчилигинин кеңешчиси Чарлз Моррис менен жолугушту.

Жолугушууда эки тараптуу кызматташтыкты бекемдөө маселелери талкууланып, өзгөчө жашыл экономика, энергетика жана бул багытта тажрыйба алмашуу мүмкүнчүлүгүнө басым жасалды.

Тараптар аялдардын ишкердикке активдүү катышуусун камсыздоо жана аларды колдоо чаралары боюнча пикир алышты. Ошондой эле жашыл экономика тармагында билимин жогорулатуу жана тажрыйба алуу максатында муниципалдык кызматкерлердин атайын окуу иш-чараларын уюштуруу демилгеси көтөрүлдү.

Мындан тышкары санариптештирүү, IT-технологиялар, акылдуу паркинг жана күн энергиясын пайдалануу жаатында инновациялык долбоорлорду ишке ашыруу мүмкүнчүлүктөрү каралды.

Жолугушуунун жыйынтыгында тараптар аталган багыттар боюнча долбоорлорду биргелешип ишке ашыруу жана кызматташууну мындан ары тереңдетүү боюнча макулдашышты.