20-майда Кант шаарында Улуу Ата Мекендик согуштагы Жеңиштин 80 жылдыгына арналган бокс боюнча балдар жана өспүрүмдөр арасында ачык турнир башталды. Иш-чараны Ысык-Ата районунун бокс федерациясы уюштурду.

Турнирге Кыргызстандын ар кайсы аймактарынан 2009-2015-жылдары туулган 250дөн ашык жаш спортчулар, ошондой эле коңшу Казакстандан келген коноктор катышууда. Мелдештер ышкыбоздор боксунун расмий эрежелери боюнча түрдүү салмак категориялары боюнча өткөрүлөт.

Турнирдин ачылышында Кыргыз Республикасынын Улуттук статистикалык комитетинин төрагасы, Ысык-Ата райондук бокс федерациясынын президенти Бактыбек Кудайбергенов салтанаттуу куттуктоо сөзүн сүйлөдү. Ал өз сөзүндө спорттук жана патриоттук иш-чара катары турнирдин маанилүүлүгүн баса белгиледи:

«Бул турнир жөн эле мелдеш эмес, бул биздин жеңишке жеткен муундарга болгон ыраазычылыгыбыздын символу.Биз спорт аркылуу өсүп келе жаткан муундун патриоттук сезимин, рухтун күчүн, Мекенге болгон сүйүүсүн тарбиялоого аракет кылабыз.

Ачылыш аземинде ошондой эле Ысык-Ата районунун акими Эркеайым Сейитказиева жана бокс боюнча дүйнөнүн легендарлуу жети жолку чемпиону Орзубек Назаров сөз сүйлөштү.

Чүй облусунун Бокс федерациясы тарабынан төмөндөгүлөргө ыраазычылык кат тапшырылды:

• Ысык-Ата районунун акими Эркеайым Сейтказиева,
• Кант шаарынын мэри Улан Майлибашевге,
• «Эталон Вин Спец Строй» ЖЧКнын башкы директору Адилу Есеналиев –
  областта бокстун өнүгүшүнө кошкон салымы жана турнирди колдоо үчүн.

Турнирдин өнөктөштөрүнүн арасында жаштардын боксун өнүктүрүүгө үзгүлтүксүз жардам көрсөткөн «Кант-Курулуш» ООО (Рустам Шабаз) жана Эталон Вин Спец Строй компаниялары да бар.

Турнир жаш мушкерлердин спорттук чеберчилигин жогорулатууга гана эмес, сергек жашоо образын жайылтууга, жарандык аң-сезимди өнүктүрүүгө жана тарыхый эстутумду сыйлоого багытталган. Уюштуруучулар жаштар арасында патриоттуулукту, тартипти жана жолдошчулукту өнүктүрүүгө басым жасашат.

Турнирдин жеңүүчүлөрү жана байге ээлери Жеңиштин 80 жылдыгына карата медалдар, дипломдор жана эстелик сыйлыктар менен сыйланышат. Мындан тышкары, атайын номинациялар белгиленген:

• "Турнирдин мыкты мушкери"
• "Мыкты машыктыруучу"
• "Эң мыкты судья"

Турнир 23-майга чейин уланып, бардыгын жаш спортчуларды колдоого жана Улуу Жеңиштин баатырларынын эрдигин биргелешип даңктоого чакырабыз.