2025-жылдын 26-майында Чүй облусунун мектептеринде 11-класстын бүтүрүүчүлөрү үчүн окуу жылынын аякташына – «Акыркы коңгуроого» арналган салтанаттуу иш-чаралар өткөрүлөт. Коомдук тартипти сактоо, өспүрүмдөр арасындагы кылмыштуулуктун алдын алуу жана Кыргыз Республикасынын Ички иштер министрлигинин укук тартибин коргоо боюнча талаптарын аткаруу үчүн Чүй облусунан 800гө жакын милиция кызматкерлери тартылат. Иш-чаралар саат 09:00дөн 12:00гө чейин пландаштырылган.

Кошумчалай кетсек, облустун аймагында саат 09:00дөн 00:00гө чейин 200гө жакын кызматкердин катышуусунда 27 пост жана 19 мобилдик кайгуул тобу иштейт. Жашы жете элек өспүрүмдөрдүн чоңдордун коштоосуз эс алуучу жайларына баруусуна жол бербөө үчүн айрым посттор тоолуу аймактарга баруучу жолдорго коюлат.

Чүй облусунда 346 билим берүү мекемеси болсо, анын 302си майрамдык иш-чараларга катышат. Милиция кызматкерлерине мыйзамды жана кызматтык тартипти сактоо боюнча так тапшырмалар берилип, бөлүм башчылар жеринде иш-аракеттерди координациялоону камсыздайт.

Чүй облусунун ички иштер башкы башкармалыгы жарандарды майрам күнү тартипти сактоого жана күч органдары менен кызматташууга чакырат.