26-майда Кыргыз Республикасынын футбол боюнча курама командасынын окуу-машыгуусу башталды. Машыгуу 2026-жылы июнь айында өтө турган дүйнөлүк чемпионаттын тандоо турунун 3-тур оюндарына даярдык көрүү максатында өткөрүлүүдө.

«Мурас Юнайтед» базасында башкы машыктыруучу Максим Лисицындын жетекчилиги астында биринчи машыгуу болуп өттү. Машыгуу жыйынына Кыргызстандын Футбол федерациясынын президенти Камчыбек Ташиев келип, футболчуларга ийгилик каалады.

Эске сала кетсек, 2026-жылы өтө турган Дүйнө чемпиондугунун тандоо турунун 3-турунун алкагында Кыргызстан курама командасы 5-июнда конокто Түндүк Кореянын командасы менен беттешсе, 10-июнда өз талаасында БАЭ курамасы менен беттешет.

Бул беттештерге даярдануу үчүн Максим Лисицын баштаган команда Бишкекте машыгуу сборун баштап, 30-майдан тарта Сауд Арабияда машыгууну улантат.Түндүк Корея менен беттеш Сауд Арабиянын Эр-Рияд шаарында өтөт.