27 may kuni O‘zbekiston Vazirlar Mahkamasida mamlakat bosh vaziri Abdulla Aripov va Yashil iqlim jamg‘armasi ijrochi direktori Mafalda Duarte o‘rtasida uchrashuv bo‘lib o‘tdi. Suhbat chog‘ida Mafalda Duarte Prezident Shavkat Mirziyoyev rahnamoligida amalga oshirilayotgan keng ko‘lamli islohotlarga yuksak baho berib, iqtisodiyot va jamiyatning barcha muhim tarmoqlarini barqaror rivojlantirishga salmoqli hissa qo‘shayotganini ta’kidladi.

Ijrochi direktor “O‘zbekiston – 2030” milliy strategiyasida, ayniqsa, “yashil” moliyalashtirishni rivojlantirish, iqlim o‘zgarishiga moslashish va atrof-muhitni muhofaza qilish borasida belgilangan maqsadlar nafaqat ichki ahamiyatga ega, balki xalqaro hamjamiyatni ham qiziqtirayotganini alohida ta’kidladi. O‘zbekistonda iqlim xavf-xatarlarini tizimli ravishda baholash, ilmiy ma’lumotlar va tadqiqotlar asosida qarorlar qabul qilishiga alohida e’tibor qaratildi.

Tomonlar iqlim o‘zgarishiga moslashish va uning salbiy oqibatlarini minimallashtirishga qaratilgan qo‘shma loyihalarni amalga oshirishda hamkorlikni yanada kengaytirish masalalarini muhokama qildilar. O‘zbekistonda strategik ekologik tashabbuslarni amalga oshirishni jadallashtiradigan Yashil iqlim jamg‘armasining hududiy vakolatxonasini ochish muhim masalalardan biri bo‘ldi.

Bundan tashqari, Orolbo‘yida obodonlashtirish, yer resurslaridan oqilona foydalanish, ekologik vaziyatni yaxshilash sohasida innovatsion loyihalarni ishlab chiqish rejalari muhokama qilindi. Jamg‘armaning moliyaviy mablag‘laridan samarali foydalanish va Yashil universitet ko‘magida mamlakatning barqaror rivojlanishi uchun malakali kadrlar tayyorlashga xizmat qiluvchi qo‘shma ta’lim dasturlarini yaratishga alohida e’tibor qaratildi.