АСТАНА, 2 маусым – «Караван Инфо» АА.Астанада Mecenat.kz тәуелсіз әдеби сыйлығының IV маусымының жеңімпазын марапаттау рәсімі өтті. Байқау жыл сайын заманауи Қазақстанның келбетін ашатын үздік романдарды анықтап, дарынды қаламгерлерге қолдау көрсетеді.

Биылғы жылы ұсынылған 21 қолжазбаның ішінен жас жазушы Әлихан Жақсылықтың қазақ тіліндегі «Тургеневтің дүниедегі өмірі» романы жеңімпаз атанды. Онлайн-дауыс беру нәтижесі бойынша оқырмандар тарапынан ең үлкен қолдауға ие болған оның жұмысы болды.

Жеңімпаз меценаттардан өмір бойы ай сайын 500 доллар төлейтін аннуитеттік сақтандыру полисін алады. Роман шет тілдеріне де аударылып, басылып шығады.

Мәдениет министрлігінің өкілі Рустам Әлиұлы құттықтау сөз сөйлеп, еліміздің рухани дамуында әдебиеттің алатын орны ерекше, мемлекет тарапынан қаламгерлерді қолдаудың жүйелі шаралары жүзеге асырылып жатқанына тоқталды. Mecenat.kz сыйлығының маңызды ерекшелігі – оның бюджеттен тәуелсіздігі және жеке бастамашылардың қолдауы.

Фото: Мәдениет және ақпарат министрлігі