Акыркы беш жылда Өзбекстандын жарандары киберкылмыштардын айынан 1,9 триллион сумдан ашык зыян тартышкан. Мындай маалымат Ички иштер министрлигинин алдындагы Киберкоопсуздук борборуна болгон пресс-турда айтылды.

Бул мезгилде катталган киберкылмыштардын саны 2023-жылга салыштырмалуу 68 эсеге, ал эми 2024-жылы эле 9,1 эсеге өскөн. Эгерде 2019-жылы укук коргоо органдары тарабынан 863 факты катталса, быйыл алардын саны 59 миңге жакындады. Бүгүнкү күндө өлкөдө ар бир экинчи кылмыш санариптик технологияларды колдонуу менен жасалууда.

Кылмыштардын негизги бөлүгү — 98% жакыны — банктык карталарга байланыштуу. Бул уурулук, онлайн алдамчылык жана жасалма кредиттерди камтыйт. Кылмышкерлер татаал ыкмаларды колдонушат: чабуулдардын 60% зыяндуу шилтемелер жана программалар аркылуу, 16% – SMS коддору аркылуу ишке ашат. Башка схемаларга жасалма онлайн сатуулар, тез инвестициялык долбоорлор жана жасалма онлайн дүкөндөр кирет.

Адистер технология өнүккөн сайын алдамчылык ыкмалары да өнүгүп жатканын белгилешет. Ошондуктан киберкоркунучтарга каршы күрөшүү техникалык чечимдерди гана эмес, калктын санариптик сабаттуулугун жогорулатууну да талап кылат. Пресс-турдун жүрүшүндө Киберкоопсуздук борборунун кызматкерлери алдамчылардын негизги схемалары жана алардан коргонуу чаралары тууралуу айтып беришти.

Иш-чаранын негизги тыянагы – санариптик мейкиндикте ар бир адам өзүнүн биринчи коргоочусу болушу керек. Колдонуучунун тобокелдиктер тууралуу маалыматы канчалык жогору болсо, кибер алдамчылыктан улам акчаны жоготуу ыктымалдыгы ошончолук аз болот.

Сүрөт: Ачык булактар