Ўзбекистон Республикаси Инвестициялар, саноат ва савдо вазири Лазиз Қудратов АҚШ нинг Глобал инфратузилма ва инвестициялар бўйича ҳамкорлигининг махсус координатори вазифасини бажарувчи Ҳелайна Маца билан учрашди.

Учрашувда транспорт инфратузилмасини ривожлантириш, геология ва рақамлаштириш лойиҳаларига хусусий молиялаштиришни жалб этиш масалалари муҳокама қилинди.

Ушбу ташаббус АҚШ томонидан 2022 йил июнь ойида бўлиб ўтган «Катта еттилик» саммитида илгари сурилган эди. Асосий мақсад инвестицияларни ривожланаётган мамлакатларда юқори сифатли инфратузилмани ривожлантиришга йўналтиришдир.

Хусусан, АҚШ Федерал молиялаштириш ва хусусий сектор инвестициялари орқали 5 йил давомида 200 миллиард долларгача, «Катта еттилик» мамлакатлари эса 600 миллиард долларгача грант ажратади. Ташаббусни амалга оширишда Жаҳон банки ва BlackRock, Brookfield ва Global Infrastructure Partners каби хусусий инвестиция компаниялари иштирок этмоқда.

Томонлар икки томонлама ҳамкорлик, жумладан, инвестициялар ва қўшма ташаббусларни амалга ошириш масалаларини муҳокама қилдилар. Учрашув якунида муҳокама қилинган барча соҳаларда ҳамкорликни янада чуқурлаштириш ва кенгайтириш бўйича қатъий мажбурият тасдиқланди.

Сурат: Ўзбекистон Республикаси Ҳукумати портали