Бишкекте Суу чарба, айыл чарба жана кайра иштетүү өнөр жай министрлиги Бириккен Улуттар Уюмунун Азык-түлүк жана айыл чарба уюму (ФАО) менен биргеликте айыл чарба продукцияларына байкоо жүргүзүү системасын киргизүү боюнча тааныштыруу семинарын өткөрдү.

Иш-чара ФАОнун Техникалык Кызматташтык Программасынын (ТКП) алкагында өтүп, агроазык-түлүк тармагын санариптештирүү, продукциянын сапатын жана коопсуздугун камсыздоого багытталган.

Система продукциянын фермерден керектөөчүгө чейинки жолун байкоого мүмкүндүк берет, бул калктын ишенимин арттырып, Кыргызстандын экспорттук мүмкүнчүлүктөрүн кеңейтет.

Семинарга министрликтин тиешелүү бөлүмдөрүнүн өкүлдөрү жана ФАОнун эксперттери катышты. Катышуучуларга долбоордун максаттары, ишке ашыруу этаптары жана күтүлгөн натыйжалар сунушталды.

"Дүйнөлүк рынок продукциянын келип чыгышына көбүрөөк көңүл буруп жатат. Кыргызстанда мындай системанын түзүлүшү экспортту өнүктүрүү үчүн кеңири перспективаларды ачат", – деп белгиледи ФАОнун аймактык кеңсесинин экономисти Педро Ариас.

ФАОнун Кыргыз Республикасындагы Өкүлү Олег Гучгелдыев кошумчалагандай: «Көзөмөл жүргүзүү – бул жөн гана көзөмөл эмес, чарбадан столго чейинки чынжырдагы ишенимдин негизги звеносу».

Долбоор АгроСмарт мамлекеттик мекемеси менен өнөктөштүктө ишке ашырылууда, ал системаны техникалык жактан өнүктүрүүгө жана улуттук деңгээлде ишке киргизүүгө жооптуу. Кызматташтык ФАО менен министрликтин ортосунда келишимге кол коюлгандан кийин формалдуу болду. Документке ФАОнун Кыргыз Республикасындагы өкүлү Олег Гучгелдыев жана санариптик өнүктүрүү министринин орун басары Асел Кененбаева кол коюшту.

Системаны ишке ашыруу пилоттук региондордон жана продукциянын айрым түрлөрүнөн башталат, андан кийин ченемдик укуктук базаны, техникалык стандарттарды жана ведомстволор аралык өз ара аракеттенүү механизмдерин эске алуу менен системаны республикалык деңгээлде масштабдоо боюнча сунуштар даярдалат.