Премьер-Министрдің орынбасары — ұлттық экономика министрі Нұрлан Байбазаров Еуропалық қайта құру және даму банкінің (ЕҚДБ) Орталық Азия және Моңғолия бойынша басқарушы директорының м.а. Хусейн Өзханмен кездесу өткізді.

Кездесу барысында тараптар банктің қолданыстағы жобалары мен жаңаларын қаржыландыру жоспарларын қарады.

Х. Өзханның айтуынша, 2024 жылы ЕҚДБ Қазақстан экономикасына инвестиция көлемін кем дегенде екі есеге арттыруды жоспарлап отыр. Қазіргі уақытта банк елдің батысында электрмен жабдықтау сенімділігін арттыруға көмектесетін KEGOC электр желілерін басқару жөніндегі ірі жобамен жұмыс істеуде.

Бұдан басқа, ірі аумақтық жобаға – Ақтөбе қаласында жаңа тазарту құрылыстарын салуға қол қойылды; «Аралтұз» АҚ-ның ас тұзының өндірістік қуаттарын салуға және әйелдер мен жастар кәсіпкерлігін қолдауға қаражат бөлінді. Сонымен қатар, 2024 жылдың маусым айында Алматы әуежайының жаңа жолаушылар терминалы ашылды, ол да ЕҚДБ қолдауымен салынды. Банк «Air Astana»ұлттық авиатасымалдаушысының биржаға (IPO) алғашқы шығуына да қатысты.

Нұрлан Байбазаров Қазақстанның ЕҚДБ-мен ынтымақтастықты ел ішінде де, өңірлік деңгейде де кеңейтуге дайын екенін мәлімдеді.

«Біздің еліміз ЕҚДБ — мен энергетика, көлік және логистика, жаңартылатын энергия көздері мен жеке бизнесті дамыту жобаларын іске асыру үшін инвестициялар тарту бойынша өзара тиімді жұмысқа дайын»,-деп атап өтті вице-премьер.

Ескерту. Барлығы ЕҚДБ Қазақстан экономикасына 324 жобаға 10,2 млрд еуро инвестициялады. Қазіргі уақытта республикадағы банк портфелінде 2,9 млрд еуродан астам сомаға 121 жоба бар.

Фото: Қазақстан Республикасы Премьер-Министрінің ресми ақпараттық ресурсы