Qozog‘iston, 2025 yil 27 iyun – Karavan Info axborot agentligi.Qozog‘iston Milliy xoreografiya akademiyasi san’at va sport sohasidagi ta’lim tashkilotlari o‘rtasida 2025-yil uchun yetakchi universitetlar milliy reytingida birinchi o‘rinni egalladi. Ushbu reyting oliy ta'lim sohasidagi eng nufuzli ko'rsatkichlardan biri hisoblanadi.

Reyting akademik obro‘, ta’lim sifati, ilmiy faoliyat va mehnat bozorida bitiruvchilarga bo‘lgan talab kabi asosiy mezonlar asosida tuziladi.

Bu Akademiya xodimlari va talabalarining mashaqqatli mehnati va kasb mahorati samarasidir. Akademiya keyingi yillarda ham milliy, ham xalqaro miqyosda qator ijodiy va ilmiy loyihalarni muvaffaqiyatli amalga oshirdi. U zamonaviy ta’lim dasturlarini joriy etgan va yetakchi maqomini ishonchli saqlab kelmoqda.

Akademiya tarbiyalanuvchilari nufuzli xalqaro musobaqalarda yuqori natijalarga erishib, sovrinli o‘rinlarni qo‘lga kiritmoqda. Ta’lim muassasasiga nafaqat Qozog‘istondan, balki dunyoning turli burchaklaridan kelgan talabalar ham shu yerda sifatli kasbiy ta’lim olmoqda.

Talabalarning har tomonlama rivojlanishi uchun barcha shart-sharoit yaratilgan: xoreografiya va san’at yo‘nalishi bo‘yicha jahon mutaxassislari bilan muntazam ravishda mahorat darslari o‘tkazib kelinmoqda, shuningdek, yetakchi xorijiy universitetlarda akademik mobillik dasturlari orqali o‘z ta’lim darajasini oshirish imkoniyati yaratilmoqda.

Qozog‘iston Respublikasi Prezidenti Qosim-Jomart To‘qayev tashabbusi bilan mamlakatimizda ijodiy san’at sohasi jadal rivojlanmoqda. Shu munosabat bilan Qozog‘iston Milliy xoreografiya akademiyasi 2025-2026 o‘quv yili uchun “Ijodiy san’at industriyasi” yangi ta’lim dasturi bo‘yicha hujjatlar qabul qilinishini e’lon qiladi. Dastur doirasida ushbu sohadagi yetakchi mahalliy mutaxassislar tomonidan treninglar olib boriladi.

Akademiyaning asosiy maqsadi xoreografiya, san’atshunoslik, san’at menejmenti va ijodiy san’at industriyasi yo‘nalishlarida yuqori malakali kadrlar tayyorlash, shuningdek, milliy madaniyat va san’at rivojiga yangi sur’at kiritishga qodir mutaxassislarning yangi avlodini shakllantirishdan iborat.

Surat: gov.kz