БОРБОРДУК АЗИЯ, 30-июнь, 2025-жыл – Караван инфо маалымат агенттиги.Жамааттык коопсуздук келишим уюмуна (ЖККУ) мүчө-мамлекеттердин тышкы иштер министрлери Ооганстанда стабилдүүлүктү, тынчтыкты жана өнүгүүнү камсыздоо, ошондой эле эл аралык өнөктөштөр менен кызматташууну кеңейтүү боюнча аракеттерди улантуу ниетин билдиришти.

"Биз Ооганстанды тынчтык жана стабилдүү өлкөгө айландыруу үчүн көмөктөшүүгө даяр экенибизди дагы бир жолу ырастайбыз"— деп айтылат тышкы иштер министрлеринин 30-июнда Кыргызстандын Чолпон-Ата шаарында жасаган билдирүүсүндө.

Уюм Ооганстанды калыбына келтирүү жана өнүктүрүү боюнча эл аралык аракеттерге катышууга даяр экенин билдирди. Жыйынга ЖККУнун баш катчысы Имангали Тасмагамбетов да катышты.

Мындан тышкары, министрлер терроризмге жана экстремизмге алып келүүчү радикалдашууга каршы чараларды, ошондой эле Шанхай кызматташтык уюму (ШКУ) менен биргелешкен демилгелерди талкуулашты.

ЖККУ эл аралык коомчулукту Ооганстан элине гуманитардык жардамдын көлөмүн көбөйтүүгө чакырды.

Билдирүүдө ошондой эле Борбордук Азияда жана Ооганстанда БУУнун Туруктуу өнүктүрүү максаттарына (ТӨМ) жетүү үчүн аймактык борбор түзүү демилгесин колдоо баса белгиленген. Мындай борбор, катышуучулардын айтымында, тынчтыкты чыңдоого жана өзгөчө деңизге чыга албаган өлкөлөрдү өнүктүрүү программаларын координациялоого жардам берет.

Сүрөт: Караван ААнын өнөктөштөрү