Кыргыз Республикасынын Суу чарба, айыл чарба жана кайра иштетүү өнөр жай министрлиги өлкө ичинде жана чет өлкөлөрдө эмгек миграциясында жүргөн жарандарга түшүмсүз жерлерди өздөштүрүү өтүнүчү менен кайрылат.

Министрликтин маалыматы боюнча, республикада айыл чарба өндүрүшү үчүн натыйжалуу пайдаланууга боло турган 614 миң гектарга жакын түшүмдүүлүгү төмөн жерлер аныкталган. №243-токтомуна ылайык, жарандарга мындай аймактарды иштетүү менен алектенүүгө жана ошону менен Кыргызстанды айыл чарбасын туруктуу өнүктүрүү менен «жашыл аймакка» айлантууга салым кошууга мүмкүнчүлүк берилген.

Түшүмдүүлүгү аз жерлерди жана жайыттарды иштетүүнү каалагандарга ар тараптуу колдоо көрсөтүлөт. Тактап айтканда, тамчылатып сугаруу системасын орнотуу, жеңилдетилген насыяларды берүү, ошондой эле сапаттуу көчөттөрдү жана үрөндөрдү тандоо боюнча айыл чарба адистеринен кесипкөй консультацияларды алуу каралууда.

Министрлик райондук агрардык өнүктүрүү башкармалыктары менен биргеликте айыл чарба жерлерин өздөштүрүүнүн жана эффективдүү пайдалануунун бардык этаптарында жарандарга колдоо көрсөтүүгө даяр.