Қырғыз Республикасының Президенті Садыр Жапаров 3-4 шілдеде Ханкендиде өтетін Экономикалық ынтымақтастық ұйымының (ЭЫҰ) 17-ші саммитіне қатысу үшін Әзірбайжан Республикасына жұмыс сапарымен барады. Бұл туралы Қырғыз Республикасы президенті әкімшілігінің сыртқы саясат бөлімінің меңгерушісі Сағынбек Абдумуталип хабарлады.

«Саммиттің тақырыбы – «Тұрақты және климатқа төзімді болашақ үшін ЭЫҰ-ға жаңа көзқарас».

Саммитке Ұйымға мүше мемлекеттер – Ауғанстан, Әзірбайжан Республикасы, Иран Ислам Республикасы, Пәкістан Ислам Республикасы, Қырғыз Республикасы, Қазақстан Республикасы, Тәжікстан Республикасы, Өзбекстан Республикасы, Түркия Республикасы және Түрікменстанның мемлекет және үкімет басшылары қатысады.

Тараптар Ұйымның күн тәртібіндегі ағымдағы мәселелерді, соның ішінде климаттың өзгеруінің алдын алу бойынша мүше мемлекеттер қабылдаған шараларды талқылайды.

Сондай-ақ жұмыс сапары барысында Қырғыз тарапы салған Әзірбайжан Республикасының Агдам облысындағы Айкөл Манас мектебінің ресми ашылу рәсімі өтеді», — деді Сағынбек Әбдімүтәліп.