Кыргыз Республикасынын Министрлер Кабинети диний билим берүүнүн жаңы тартибин бекитти, ал өлкөдө жана чет өлкөлөрдө диний билим алуу, уюштуруу жана мониторинг жүргүзүү маселелерин жөнгө салууга багытталган.

Документ бул чөйрөдөгү мамлекеттик саясаттын принциптерин аныктайт жана диний билим берүү мекемелеринин ишмердүүлүгү үчүн укуктук негиз болуп саналат. Чет өлкөдөн диний билим алууга өзгөчө көңүл бурулууда.

Бекитилген тартипте:

• Кыргыз Республикасынын жарандары 11-классты аяктагандан кийин жана өлкөнүн ичинде диний билим алгандан кийин гана чет өлкөлүк диний окуу жайларда билим алууга укуктуу.
• Алар өлкөдөн чыгуунун алдында 14 календардык күндөн кечиктирбестен дин иштери боюнча ыйгарым укуктуу мамлекеттик органга билдирүүгө, аңгемелешүүдөн өтүүгө жана тиешелүү кабарлоо формасын толтурууга милдеттүү.
• Жарандар ошондой эле консулдук каттоого турушу же Кыргыз Республикасынын дипломатиялык өкүлчүлүктөрү аркылуу андан чыгарылууга тийиш.
• Процессти тартипке келтирүү үчүн кыргызстандыктар үчүн сунушталган чет элдик диний окуу жайлардын маалымат базасы түзүлөт. Аны түзүүнүн тартиби дин иштери жана билим берүү боюнча мамлекеттик органдардын биргелешкен буйругу менен аныкталат.

Кабыл алынган нормалар чет өлкөдөн диний билим алуунун ачык-айкындуулугун, коопсуздугун жана көзөмөлүн жогорулатууга, ошондой эле жарандардын дин тутуу эркиндигине болгон укуктарын мыйзам чегинде коргоого багытталган.