Душанбе, 6-июль, – «Караван Инфо» МА.Тажикстан Республикасынын Президенти Эмомали Рахмон Азербайжандын Ханкенди шаарында өткөн Экономикалык Кызматташтык Уюмунун (ЭКУ) 17-саммитине катышып, сөз сүйлөдү. Өз сөзүндө ал аймактык өнүгүүнүн негизги милдеттерин жана артыкчылыктарын белгилеп, аларды чечүүгө Тажикстан жигердүү катышууга даяр экендигин баса белгиледи.

Мамлекет башчысы Азербайжандын президенти Илхам Алиевге меймандостугу жана форумдун жогорку деңгээлде уюштурулгандыгы үчүн ыраазычылык билдирип, ЭКУ мамлекеттери менен кызматташууну Тажикстан үчүн маанилүү тышкы саясат приоритети деп атады.

Президент Рахмон ЭКУ мамлекеттери менен соода-экономикалык кызматташуу оң динамикасын көрсөтүп жатканын белгиледи: 2024-жылы Тажикстан менен катышуучу өлкөлөрдүн ортосундагы сооданын көлөмү республиканын жалпы тышкы соода жүгүртүүсүнүн 33% түзгөн, бул өткөн жылга салыштырмалуу 18%га көп.

Ал соода, транспорт, энергетика, өнөр жай жана айыл чарба тармактарында кызматташууну тереңдетүүгө чакырып, бул тармактар аймактын туруктуу өсүшү үчүн маанилүү экенин белгиледи.

Негизги демилгелердин арасында Эмомали Рахмон төмөнкүлөрдү сунуштады:

• Транзиттик жана соода документтерин санариптештирүү, бул ачыктыкты камсыз кылат, операцияларды тездетет жана чыгымдарды азайтат.
• ЭКУнун энергетикалык туруктуулугунун жаңы стратегиясын иштеп чыгуу, жашыл энергетика жана аймактык долбоорлорду ишке ашыруу, анын ичинде CASA-1000.
• Агроөнөр жайлык кластерлерди түзүү, акылдуу айыл чарбаны киргизүү жана азык-түлүк коопсуздугун жакшыртуу.

Табигый кырсыктардын жана климаттын өзгөрүшүнө байланыштуу тобокелдиктердин көбөйүп баратканын эске алып, Тажикстандын президенти ЭКУ алкагында аракеттерди координациялоого чакырды. Ал жаратылыш кырсыктарынын жана климаттык коркунучтардын кесепеттерин азайтуу боюнча биргелешкен чараларды көрүүнү, ошондой эле айлана-чөйрөнү коргоо жана жашыл технологиялар менен алмашуу жаатында кызматташууну активдештирүүнү сунуштады.

Ошондой эле гуманитардык чөйрөдө – билим берүү, саламаттыкты сактоо жана туризм тармагындагы байланыштарды кеңейтүү демилгеси айтылды. Эмомали Рахмон Тажикстандын ЭКУ мамлекеттери менен маданий байланыштарды чыңдоого кызыкдар экенин ырастады.

Глобалдык кризистердин курчушуна, өзгөчө Жакынкы Чыгыштагы кырдаалга токтолуп, Тажикстандын президенти чыр-чатакты саясий жана дипломатиялык жол менен гана тынчтык жолу менен чечүүнү колдой турганын билдирди.

Соңунда ал ЭКУнун 17-саммитинин жыйынтыктары бардык катышуучу-өлкөлөрдүн кызыкчылыктарына жооп берген өз ара пайдалуу жана көп тараптуу кызматташтыкты тереңдетүүгө негиз болуп каларына ишенимин билдирди.

СУР0ТТ0: Тажикстан Республикасынын Президентинин басма сез кызматы