Муджу, 15 шілде, 2025 жыл – Karavan Info ақпараттық агенттігі.Қазақстандық таэквондошылар Оңтүстік Кореяның Муджу қаласында өткен World Taekwondo Diamond Game 2025 G-4 халықаралық турнирінде сәтті өнер көрсетіп, барлығы алты жүлдені жеңіп алды.

Аралас командалық сайыста Қазақстан құрамасы финалға шықты. Шешуші кездесуде өзбекстандық қарсыластарынан 0:2 есебімен ұтылып, күміс жүлдені қанағат тұтты.

Аралас команда құрамында Мерген Ғаниев, Абдурахмон Марипов, Камила Аймұқашева және Аида Тәукенова болды.

Қазақстандық спортшылар командалық табыстан бөлек, жеке пәндер бойынша да ерекшеленді:

• Бекасыл Ергеш (80 келіге дейінгі салмақ дәрежесі) – күміс медаль.
• Аяулым Асқар (67 келіге дейінгі салмақ дәрежесі) – күміс медаль.
• Нұрбек Ғазес (68 келіге дейінгі салмақ дәрежесі) – қола медаль.
• Альмира Қанат (57 келіге дейінгі салмақ дәрежесі) – қола медаль.

Осыған дейін Қазақстан әйелдер құрамасы да бұл турнирде күміс медаль жеңіп алған болатын, бұл команда қоржынындағы алтыншы жүлде болды.

Фото:ҚР ҰОК