Халықаралық азаматтық авиация ұйымы (ИКАО) қарамағындағы  Қазақстан Республикасының тұрақты өкілі Тимур Тілегенов Монреальдағы ИКАО штаб-пәтерінде ИКАО Бас хатшысы Хуан Карлос Салазарға сенім грамоталарын табыс етті.

Әңгіме барысында азаматтық авиация саласындағы ынтымақтастықты дамытудың өзекті мәселелері талқыланды. Бас хатшы Қазақстанның ИКАО қарамағындағы Тұрақты өкілдігін ашу туралы шешімі үшін ҚР Президенті Қасым-Жомарт Тоқаевқа алғысын білдіріп, Тимур Тілегеновті қызметіне кірісуімен құттықтады. Хуан Карлос Салазар Қазақстанның ИКАО жанындағы қызметі республика мен ұйым арасындағы өзара іс-қимылды одан әрі нығайтуға ықпал ететініне сенім білдірді.

Соңында тараптар Қазақстан мен ИКАО арасындағы практикалық диалогты одан әрі кеңейтудің міндеттемесі мен маңыздылығын растады.

Фото: ҚР СІМ