Таиланд үкіметі Өзбекстан азаматтары үшін 60 күнге дейін визасыз режим енгізілгенін жариялады. Мамыр айының соңында жарияланған бұл бастама 2024 жылдың 15 шілдесінде күшіне енді, деп хабарлайды Бангкоктағы Өзбекстанның бас консулдығы.

Бұған дейін Өзбекстан азаматтары 60 долларға елдің әуежайына келген кезде 15 күндік туристік виза ала алатын. Алайда, жаңа визалық режим шекара бекеттері арқылы өтетін барлық келушілерге қолданылады. Айта кету керек, Таиланд бұл шараны мемлекет экономикасын ынталандыру мақсатында біржақты түрде енгізді.

Таиланд сыртқы істер министрлігі өкілдерінің айтуынша, қазіргі уақытта Өзбекстан мен Таиланд арасында өзара визасыз режим туралы екіжақты келісім жасасу туралы келіссөздер жалғасуда.

Фото: Өзбекстан СІМ