МОСКВА, 23-июль, 2025-жыл — Караван инфо агентствосу.Талибандын Тышкы иштер министрлиги билдиргендей, Орусиянын тышкы иштер министри Сергей Лавров менен Ооганстандын тышкы иштер министринин милдетин аткаруучу Амир Хан Муттаки телефон аркылуу сүйлөшүүдө саясий мамилелерди чыңдоо, экономикалык кызматташтыкты кеңейтүү жана бир катар аймактык маселелерди талкуулашты. Тараптар баңгизаттарды мыйзамсыз жүгүртүүгө каршы күрөшүү зарылдыгына өзгөчө көңүл бурушту.

Шаршемби күнү тараткан пресс-релизинде Талибандын Тышкы иштер министрлиги Муттакиге шилтеме жасап, Орусиянын талиптердин өкмөтүн тааныганын жарыялоосу Ооганстанды эл аралык коомчулукка интеграциялоо багытында болуп көрбөгөндөй кадам болуп, эки өлкөнүн саясий жана экономикалык карым-катнашына жол ачты деп билдирди.

Мындан тышкары, Амир Хан Муттаки Орусия менен баңгизат менен күрөшүүдө, ошондой эле аймактык долбоорлорду ишке ашырууда жана транспорт коридорлорун өнүктүрүүдө кызматташуунун маанилүүлүгүн белгиледи.

Сергей Лавров өз кезегинде талиптердин таанылышы эки тараптуу саясий, экономикалык жана эл аралык кызматташуу үчүн жаңы мүмкүнчүлүктөрдү ачканын белгилеп, бул жакынкы келечекте практикалык натыйжаларды берерине ишенимин билдирди.

Талибандын Тышкы иштер министрлигинин маалыматына караганда, Лавров кыймылдын баңгизаттын жайылышын алдын алуу жана коопсуздукту чыңдоо аракетин жогору баалап, Муттакини кызматташтыкты кеңейтүү, аймактык механизмдерди чыңдоо жана башка актуалдуу маселелерди талкуулоо үчүн Москва форматындагы кийинки жыйынга катышууга чакырды.

Сүрөт: Караван ААнын өнөктөштөрү