МОСКВА, 11-сентябрь, 2025-жыл.Америка Кошмо Штаттарында 31 жаштагы саясий активист, "Турning Point USA" кыймылынын жетекчиси Чарли Кирк трагедиялуу түрдө каза болду. Кол салуу анын Юта өрөөнүндөгү университетте эл алдында сүйлөгөн учурунда болгон.

Жүздөгөн студенттердин жана коноктордун көзүнчө Кирк мойнуна ок тийип, көп өтпөй ооруканада каза болгон.

АКШ президенти көңүл айтып, Кирктин жаркын элесине желектерди ылдый түшүрүүнү буйруду жана күнөөлүүлөр табылып, жазаланаарын убада кылды.

Чарли Кирк америкалык консервативдик лагердин көрүнүктүү өкүлдөрүнүн бири болгон.

CNN телеканалынын айтымында, ал жаштарды мобилизациялоо жана республикачылар тарапка тартуу менен Дональд Трамптын шайлоодогу жеңишинде чоң роль ойногон.

Саясатчыга жакын булактар Кирк акыркы мезгилде Израилдин саясатына карата позициясын кайра карап чыга баштаганын жана анын коопсуздугу үчүн мүмкүн болуучу тобокелдиктерди ачык айтып жатканын ырасташууда.

Анын кесиптештери бул кадамды Кэндис Оуэнс жана башка консервативдүү фигуралардын көз караштарынын мурунку жылышына салыштырышты.

Бул тууралуу орус президентинин атайын өкүлү Кирилл Дмитриев билдирди. Ал белгилегендей, киши өлтүрүү аракети АКШдагы саясий ажырымдын тереңдигин көрсөтүп турат.

Анын айтымында, Кирк өзүнүн жаркын консервативдүү риторикасы менен гана эмес, Орусия менен диалогдун маанилүүлүгү тууралуу билдирүүлөрү менен да белгилүү болгон.

Чарли Кирк 2012-жылы Америка Кошмо Штаттарынын эң чоң консервативдүү студенттик тармагына айланган Turning Point USA уюмун негиздеген. Ал Дональд Трамптын катуу колдоочусу болгон жана Республикалык жаштар канатын түзүүгө жардам берген.

Сүрөт: Тесс Кроули / Deseret News 2025