Астана, 11-сентябрь, 2025-жыл – Караван Инфо маалымат агенттиги.Казакстан Республикасынын Билим берүү министри Гани Бейсембаев Сингапур жана Улуу Британия менен биргеликте билим берүү маселелери боюнча эл аралык уюм түзөрүн билдирди. Мындай чечим Астанада эл аралык эксперттердин катышуусунда өткөн тегерек столдун жыйынтыгында кабыл алынганын ведомствонун басма сөз кызматы билдирди.

Казакстанда “Адал Азамат” программасын ишке ашыруунун эки жыл ичинде алты негизги багытты жана 77 кадамды камтыган бирдиктүү билим берүү экосистемасы түзүлдү. Ата-энелердин окуу процессине катышуусу үч эсеге өстү, мектептерде ата-энелерге педагогикалык колдоо көрсөтүү борборлору, аймактарда психологиялык жардам көрсөтүү борборлору иштеп жатат.

Эл аралык эксперттер билим берүүнүн казакстандык моделине жогору баа беришти. Британдык профессор Том Харрисон улуттук баалуулуктардын дүйнөлүк тенденциялар менен гармониялуу айкалышын белгилесе, сингапурлук профессор Ляо Шао Жун салттар менен инновацияларды айкалыштырууга мүмкүндүк берген ыкманын стратегиялык мүнөзүн баса белгиледи.

2025-жылдын 1-сентябрынан тарта «Адал Азамат» программасы өлкөдөгү бардык билим берүү уюмдарында, анын ичинде жеке менчик мектептерде ишке ашырыла баштады. Программанын баалуулуктары билим берүү процессине интеграцияланган жана предметтердин, класстык сааттардын жана класстан тышкаркы иш-чаралардын мазмунунда чагылдырылган.

Сүрөт:Казакстан Республикасынын Билим берүү министрлиги