Душанбе, 16 сентябр, – АИ «Корвон Иттилоот». Шоми имрӯз дар майдончаҳои тенниси тобистонаи Корхонаи воҳиди давлатии «Роҳи оҳани Тоҷикистон» маросими ифтитоҳи Мусобиқаи 15-уми байналмилалӣ оид ба теннис барои дарёфти Ҷоми Президенти Ҷумҳурии Тоҷикистон баргузор мегардад.

Дар мусобиқа 60 теннисбоз ва ҳайатҳои беҳтарин аз 13 давлати ҷаҳон, аз ҷумла Тоҷикистон, Русия, Чин, Эрон, Амрико, Арабистони Саудӣ, Покистон, Кореяи Ҷанубӣ, Қазоқистон, Ӯзбекистон, Туркманистон ва Қирғизистон иштирок мекунанд.

Ҳадафи мусобиқа муттаҳид кардани варзишгарон дар риштаи теннис, тақвияти ҳамкории байналмилалӣ ва рушди теннис дар Тоҷикистон арзёбӣ мешавад. Дар кишвар Федератсияи тенниси Тоҷикистон ва бадминтон ва Муассисаи давлатии Мактаби ҷумҳуриявии маҳорати олии варзишӣ оид ба теннис ва бадминтон фаъолият доранд. Панҷ сол пеш дар Душанбе Қасри теннис ба истифода дода шуд, ки заминаи устувор барои рушди варзиш ва омода кардани мутахассисони баландихтисос фароҳам овард.

Теннис на танҳо як намуд варзиши маъмули байналмилалӣ аст, балки барои рушди ҷисмонӣ ва беҳтар шудани саломатӣ низ аҳамияти калон дорад. Номи он аз калимаи фаронсавии «tenez» — «баробар» гирифта шудааст. Таърихшиносон таъкид мекунанд, ки теннис дар Юнони қадим пайдо шуда, баъзеҳо макони пайдоиши онро Арабистон медонанд. Соли 1872 аввалин клуби касбии теннис таъсис ёфт ва ин варзиш ба ҷаҳони муосир ворид гардид.

Мусобиқаи байналмилалӣ дар Душанбе на танҳо имконияти рақобати варзишгаронро фароҳам меорад, балки дар тақвияти ҳамкории байналмилалӣ, омода намудани мутахассисони нав ва рушди варзиши замонавӣ дар Тоҷикистон нақши стратегӣ дорад. Иштирок дар чунин чорабиниҳои ҷаҳонӣ барои баланд бардоштани сатҳи варзишгарон ва шиносоӣ бо таҷрибаи байналмилалӣ аҳамияти махсус дорад.

АКС: АМИТ «ХОВАР»