МОСКВА, 12-сентябрь, 2025-жыл — «Караван инфо» агентствосу.Бразилиянын мурдагы президенти Жаир Болсонаро 2022-жылдагы президенттик шайлоодон кийин мамлекеттик төңкөрүш жасоо аракети үчүн күнөөлүү деп табылды.

Жогорку Соттун беш судьясынын төртөө бардык беш берене боюнча коюлган айыптарды күчүндө калтырып, мурдагы президентти 27 жыл үч айга эркинен ажыратты.

Сот Болсонаро 2023-жылдын 8-январында мамлекеттик имараттарды басып алуу учурунда мамлекеттик төңкөрүштү даярдоого, куралдуу кылмыштуу уюмду түзүүгө, демократиялык түзүлүштү күч менен кулатууга аракет кылууга, мамлекеттик мекемелерге кол салууга жана корголгон мамлекеттик мүлккө зыян келтирүүгө катышкан деп тапты. Мурдагы лидер өзү эч кандай күнөөсүн мойнуна алган эмес.

Сот процесси олуттуу социалдык пикир келишпестиктерди жаратып, миңдеген Болсонаро тарапкерлери Эгемендүүлүк күнүндө сот процессине нааразылык билдирип көчөгө чыгышты.

2022-жылдын октябрында Бразилиядагы президенттик шайлоодо Луис Инасиу Лула да Силва жеңген. Анын инаугурациясынан кийин Болсонаронун тарапкерлери төңкөрүш аракети катары кабыл алынган парламентке, Жогорку Сотко жана президенттик резиденцияга чабуул коюшкан. Прокуратура тергөө амалдарын жүргүзүп, анын натыйжасында азыркы өкүм чыгарылды.

Сүрөт:Ачык булактар