Кыргыз Республикасынын Президенти Садыр Жапаровдун Нью-Йорк шаарына (Америка Кошмо Штаттары) жумушчу сапары аяктады.

Сапардын биринчи күнүндө БУУнун Башкы Ассамблеясынын 80-юбилейлик сессиясынын Жогорку деңгээлдеги жумалык иш-чараларынын алкагында мамлекет башчысы Улуу Британиянын мурдагы премьер-министри, учурда Глобалдык өзгөрүүлөр институтунун Аткаруучу төрагасы Тони Блэр менен жолугушту.

Жолугушуунун жүрүшүндө Кыргызстан менен Глобалдык өзгөрүүлөр институтунун ортосундагы өз ара пайдалуу кызматташуунун келечеги талкууланды.

Ошол эле күнү президент АКШнын Түштүк жана Борбор Азия боюнча атайын өкүлү Сержио Гор менен жолугушту.

Жолугушууда эки тараптуу жана көп тараптуу форматта, анын ичинде экономикалык кызматташтык чөйрөсүндө мамилелерди чыңдоо талкууланды.

Экинчи күнү президент 195 өлкөнүн мамлекет башчылары жана делегациялары катышкан БУУнун Башкы ассамблеясынын 80-сессиясынын жалпы дебаттарынын ачылышына катышты.

Бириккен Улуттардын Уюмунун Генеральный Ассамблеясынын юбилейлик сессиясы «Бирге жакшыраак» деген ураан астында ачылды.

Жогорку деңгээлдеги жумалыктын алкагында бир катар жолугушуулар болду, анын ичинде президент Садыр Жапаров Австриянын федералдык канцлери Кристиан Стокер менен жолугушту.

Жолугушуунун жүрүшүндө кыргыз-австриялык кызматташуунун, анын ичинде экономика, инвестиция, экология, туризм жаатындагы маселелер талкууланды.

Кыргызстандын Президенти ошондой эле Намибиянын Президенти Нетумбо Нанди-Ндайтва менен жолугушуп, анда тараптар өнүгүү стадиясында турган (эки өлкөнүн дипломатиялык мамилелери 2000-жылы түзүлгөн) кыргыз-намибия мамилелеринин азыркы абалын жана келечегин талкуулашты.

Мындан тышкары, мамлекет башчысы Габон Республикасынын президенти Брис Клотар Нгуема менен жолугушту.

Бул жолугушууда дипломатиялык мамилелерди орнотуу боюнча биргелешкен коммюникеге кол коюлду.

Президенттин кезектеги сүйлөшүүлөрү Гвинея-Бисаунун президенти Оумару Сисоко Эмбало менен болду.

Эки өлкөнүн ортосундагы дипломатиялык мамилелер 2025-жылдын февраль айында түзүлгөн.

Жолугушуунун жүрүшүндө лидерлер диалогду өнүктүрүү ниетин ырастап, кызматташуунун конкреттүү багыттарын аныктоого макулдашышты.

Андан соң Президент Садыр Жапаров АКШнын Глобалдык өнөктөштүк боюнча атайын өкүлү Паоло Замполли менен сүйлөшүүлөрдү жүргүзүп, тараптар эки тараптуу жана көп тараптуу форматта мамилелерди мындан ары өнүктүрүү боюнча пикир алышты.

Дебаттардын алдында мамлекет башчы Тажикстандын президенти Эмомали Рахмон менен кыскача жолугушуу өткөрдү. Лидерлер аймактык маселелер боюнча пикир алмашып, КМШ мамлекет башчыларынын алдыда боло турган саммитинин маселелери боюнча макулдашышты.

Бул жерде президент Садыр Жапаров Франциянын президенти Эммануэль Макрон менен пикир алмашууга мүмкүнчүлүк алды. Лидерлер эл аралык күн тартибин да талкуулашты.

Андан соң президент Садыр Жапаров БУУнун Башкы ассамблеясынын 80-сессиясынын жалпы дебатында сөз сүйлөдү.

Мамлекет башчысы өз сөзүндө Кыргызстанга каршы адилетсиз санкцияларды алып салууга, тоңдурулган ооган мүлктөрүн ооган элине кайтарып берүүгө, Палестинадагы геноцидди токтотууга чакырды.

Садыр Жапаров ошондой эле өзөктүк куралдан баш тартууга, тынчтык орнотуу аракеттерин күчөтүүгө жана климаттын өзгөрүшүнө каршы күрөшүүдө эл аралык коомчулуктун биргелешкен аракеттерине чакырды.

Ошол эле күнү БУУнун Башкы ассамблеясынын 80-сессиясына байланыштуу АКШ президенти Дональд Трамптын жана АКШнын биринчи айымынын атынан мамлекет башчылары үчүн кабыл алуу болду.

Сапардын үчүнчү күнүндө мамлекет башчысы БУУнун баш катчысы Антониу Гутерриш менен жолугушту.

Андан соң Башкы ассамблеянын алкагында президент Садыр Жапаров Тонга Королдугунун Премьер-министри Айсаке Эке менен жолугушту.

Тараптар эл аралык уюмдардын алкагындагы демилгелерди өз ара колдоону макулдашты.

Өлкөлөр ортосундагы дипломатиялык мамилелер 2022-жылдын 7-декабрында түзүлгөн.

24-сентябрда мамлекет башчы БУУнун Башкы ассамблеясынын 80-сессиясында климаттын өзгөрүшү боюнча атайын иш-чарада сөз сүйлөдү.

Ал өз сөзүндө өткөн аптада өлкөнүн климаттын өзгөрүшүнө каршы күрөшүү боюнча милдеттенмелерин аткаруу үчүн Үчүнчү Улуттук Белгиленген Салым (ҮДК) боюнча документ кабыл алынганын белгиледи.

Ушул эле күнү президент Садыр Жапаров Португалиянын президенти Марсело Ребело де Соуса менен сүйлөшүүлөрдү өткөрдү.

Кызматташтыкты тереңдетүү маселелери, ошондой эле эл аралык күн тартибинин негизги аспектилери талкууланды.

Эки тараптуу жолугушууларды жыйынтыктап жатып, президент Садыр Жапаров Улуу Британиянын вице-премьер-министри Дэвид Лэмми менен кыскача сүйлөшүүлөрдү өткөрдү.

Жолугушууда эл аралык күн тартибиндеги маселелер боюнча пикир алмашуу болду.

Садыр Жапаров дагы БУУнун Коопсуздук кеңешинин жыйынында “Жасалма интеллект: эл аралык коопсуздук жана тынчтык” деген темада сөз сүйлөдү.

Жыйындагы сөзүнүн аягында президент Садыр Жапаров Кыргызстан БУУнун Коопсуздук кеңешинин 2027-2028-жылдарга туруктуу эмес мүчөлүгүнө талапкерлигин көрсөтүп жатканын билдирди.

Президент Садыр Жапаров АКШдагы иш сапарын аяктаган соң 25-сентябрда Бишкекке кайтып келди.