24-сентябрда Кыргыз Республикасынын Президенти Садыр Жапаров Нью-Йорк шаарында Бириккен Улуттар Уюмунун Башкы катчысы Антониу Гутерриш менен жолугушту.

Жолугушуунун алдында мамлекет башчысы БУУнун Ардактуу коноктор китебине кол койду.

Садыр Жапаровду жылуу кабыл алып, Антониу Гутерриш жолугушууга канааттангандыгын билдирип, Кыргызстан тез өнүгүп жатканын белгилеп, өлкөнүн Борбор Азиядагы тынчтыкты жана стабилдүүлүктү камсыздоодогу ролун баса белгиледи.

Өз кезегинде президент Садыр Жапаров уюмдун башкы катчысын жана кызматкерлерин түзүлгөндүгүнүн 80 жылдыгы менен куттуктады.

Ал Кыргызстан БУУнун толук укуктуу мүчөсү катары Уставда жазылган максаттарга жана принциптерге берилгендигин жана климаттын өзгөрүшү, жакырчылык, чыр-чатактар жана теңсиздик сыяктуу глобалдык актуалдуу көйгөйлөрдү чечүүдө дүйнөлүк коомчулук менен жигердүү кызматташууну максат кылып жатканын баса белгиледи.

Мындан тышкары, президент Антониу Гутерришти Кыргызстандын ШКУга төрагалык кылуусунун алкагында 2026-жылдын күзүндө Бишкекте өтө турган ШКУ+ саммитине катышууга чакырды.

Башкы катчы чакыруу үчүн ыраазычылык билдирип, иш-чарага катышууга даяр экенин билдирди.

Жыйынтыгында тараптар тынчтыкты, стабилдүүлүктү, туруктуу өнүгүүнү жана адам укуктарын коргоону камсыз кылуу боюнча өнөктөштүктү жана биргелешкен күч-аракеттерди бекемдөөгө өз ара ниеттерин ырасташты.