МОСКВА, 2-октябрь, 2025-жыл — «Караван инфо» агентствосу.Орусия менен Ирандын ортосундагы Ар тараптуу стратегиялык өнөктөштүк келишими расмий түрдө күчүнө киргенин Орусиянын Тышкы иштер министрлиги билдирди.

«Документ эки өлкөнүн жогорку саясий жетекчилигинин Россия менен Ирандын элдеринин кызыкчылыгына туура келген достук жана жакшы коңшулук мамилелерди мындан ары чыңдоо боюнча стратегиялык тандоосун чагылдырат», – деп баса белгиледи ведомство.

Белгилей кетсек, келишимге 17-январда Ирандын президенти Масуд Пезешкяндын Москвадагы сапарынын алкагында кол коюлган.

Тараптар экономикада ар тараптуу кызматташуу, биргелешкен аскердик машыгууларды өткөрүү, агрессияга жана сепаратизмге каршы туруу, эл аралык терроризмге каршы күрөштө координациялоо боюнча макулдашты.

Санкцияларга каршы турууга, көз карандысыз төлөм инфраструктурасын түзүүгө, жалган маалымат менен күрөшүү үчүн ЖМКны өнүктүрүүгө, атомдук энергетика жана газ долбоорлорун тынчтык максатта пайдалануу боюнча кызматташууга өзгөчө көңүл бурулат.

Орусиядан Иранга газ кууру Азербайжан аркылуу өтөт жана тараптар баа түзүү принциптерин макулдашты.

Келишим автоматтык түрдө беш жылга узартуу менен 20 жылга түзүлдү жана өлкөлөр ортосундагы мамилелердин фундаменталдык принциптери боюнча мурдагы 2001-жылдагы келишимди алмаштырат.

Документ Москва менен Тегерандын ортосундагы өнөктөштүктүн жаңы деңгээлин бекитет жана бардык стратегиялык маанилүү тармактарда кызматташууну кеңейтүү үчүн перспективаларды ачат.

Сүрөт: Ачык булактар